ہفتہ بلاگستان : دعوتِ شرکت

السلام علیکم

کل پندرہ اگست ہے اور کل سے “ہفتہ بلاگستان” کا آغاز ہونا ہے ۔ یہ پوسٹ یاد دہانی کے طور پر ہے۔ آپ تمام بلاگرز جنہوں ہفتہ بلاگستان کے انعقاد کے سلسلے میں اپنی مفید آراء کا اظہار کیا اور رہنمائی کی آپ سب کا بہت شکریہ ۔ اس پوسٹ کے بعد کچھ مزید آراء سامنے آئیں جن کے مطابق یہ کہ بلاگرز کی سہولت کے پیش نظر مسلسل سات دن تک روزانہ لکھنے کی بجائے دورانیہ دو ہفتوں تک بڑھا دیا جائے لہذا اب دورانیہ پندرہ اگست 09 سے ماہ اگست کے آخر تک ہو گا ۔ جن عنوانات اور موضوعات میں آپ شریک ہوسکتے ہیں وہ فہرست یہاں اور یہاں درج ہے ۔

چونکہ اب دورانیہ بڑھ گیا ہے آپ ان موضوعات میں سے تمام میں شریک ہوسکتے ہیں یا اپنی دلچسپی کے لحاظ سے موضوعات اس فہرست سے شرکت کے لیے منتخب کر سکتے ہیں ۔

جو بلاگرزمصروف ہوں یا بلاگرز جو پاکستان میں ہیں ان کے لیے بجلی اور انٹرنیٹ کی دستیابی کے مسائل کے سبب سے مذکورہ فہرست کی ترتیب کو فالو کرنا مشکل رہے گا ایسی صورت میں کسی بھی موضوع کو اس دورانیہ میں کسی بھی دوسرے دن بلاگ کر لیں ۔

میرے پاس اس دورانیہ میں فرصت ہو گی مختلف دنوں میں سو “ہفتہ بلاگستان” کی اپڈیٹ دینا بھی کسی حد تک ممکن ہو گا میرے لیے ۔ تاہم انٹرنیٹ کی عدم دستیابی اگر درپیش رہی تو پھر یہ انجام دہی ناممکن ہو جائے گی ۔ ایسی صورت میں ہفتہ بلاگستان کے لیے کوئی ایک یا زائد بلاگرز اپڈیٹ دینا چاہیں تو بہت بہتر رہے گا ۔

راشد کامران بھائی نے “ہفتہ بلاگستان کے خصوصی زمرے” کی مفید تجویز دی ہے اس کی تفصیل یہاں موجود ہے ۔

اگر اس دورانیہ میں مکمل فہرست میں شرکت کے علاوہ بھی آپ مزید کسی موضوع کو شامل فہرست کرنا چاہیں تو اس موضوع پر اپنے بلاگ پر ایک پوسٹ کر دیں اور دیگر بلاگرز کو اس موضوع پر شرکت کی دعوت دے دیں ۔

ہفتہ بلاگستان کی فہرست میں ایک دن ٹیگ کے لیے مخصوص ہے ، یہ ٹیگ کیا ہو ؟ ماہرین و متاثرینِ ٹیگ توجہ پلیز

“ہفتہ بلاگستان” اردو بلاگ کمیونٹی کو ایک مختلف انداز میں ایک پلیٹ فارم پر مل بیٹھنے ، نئے بلاگرز کی حوصلہ افزائی اور رہنمائی ، اور اردو بلاگنگ میں اہم ، منفرد اور نئے افق تلاش کرنے اور اردو بلاگنگ کو دلچسپ اور مفید بنانے کے پس منظر میں اہم کردار ادا کر سکتا ہے ، اس سلسلے میں آپ سب کو دعوتِ شرکت ہے ۔

آپ سب کا شکریہ