ہفتہ بلاگستان

ایک دن بیٹھے بٹھائے ایک تجویز سوجھ گئی تھی “ہفتہ بلاگستان” منانے کی ، اس تجویز پر آپ تمام بلاگرز جنہوں نے بلاگ پر یا مسنجر پر رائے دی اور پسند کیا اور یاد دہانی کروائی آپ سب کا بہت شکریہ ۔ گذشتہ پوسٹ تجویز کے قابل عمل ہونے کی صورت میں ہفتہ بلاگستان منانے کے لیے آرا کے پس منظر میں تھی ۔ تاریخ یا دورانیہ کب سے کب تک ہو اس سلسلے میں ساجد اقبال بھائی نے دلچسپ لکھا یعنی بغیر جھان بین کے منظور اور بس تاریخ رکھ دی جائے باقی آراء کے مطابق کسی بھی تاریخ پر اتفاق ظاہر کیا گیا ہے تو ایسا کرتے ہیں کہ ۱۵ اگست 09 سے ۲۱ اگست 09 تک کا دورانیہ رکھ لیتے ہیں ۔ یعنی تقریبا دو ہفتے بعد ۔ یہ دورانیہ چند ایک وجہ کی بنا پر ہے جیسے

تاکہ جو بلاگرز روزانہ مسلسل لکھنے کی بجائے پہلے سے اپنے ڈرافٹ تیار کر لینا چاہیں تو اس دوران تیار کر لیں ۔

اگر کسی کا بلاگ پہلے سے موجود نہ ہو تاہم بلاگ بنانے کی خواہش ہو اور “ہفتہ بلاگستان” میں شامل ہونا چاہیں تو اس دوران اپنا بلاگ تشکیل دے لیں ۔

زیادہ سے زیادہ بلاگرز تک “ہفتہ بلاگستان” کے انعقاد کی اطلاع پہنچ سکے ۔ تمام بلاگرز تک اس اطلاع کے پہنچانے کا کیا بہتر طریقہ یا ذریعہ ہوسکتا ہے ؟؟ اس سلسلے میں فہد بھائی کی تجویز کا ذکر، ایک مفید تجویز فہد بھائی نے ہفتہ بلاگستان کے لیے منظرنامہ کے حوالے سے دی ہے منظر نامہ اس ہفتہ کے انعقاد میں کیا کردار ادا کر سکتا ہے اس کے لیے منظر نامہ کو دعوت ہے ۔

یہ تو بات ہو گئی کہ ہفتہ کب منایا جائے۔ اب ترتیب کی طرف ، مختلف دنوں کی ترتیب کے لیے کوئی دوسری تجویز نہیں سامنے آئی اس لیے اسی ترتیب کو یہاں نقل کر رہی ہوں تاہم اگر کوئی تجویز یا تجاوز سامنے آئیں تو اس ترتیب میں اسی لحاظ سے تبدیلی کر لیں گے۔ ہفتہ بلاگستان منانے کی شکل کچھ اس طرح ہوسکتی ہے

ایک ہفتہ میں :

پہلا دن : یوم بچپن ۔ ۔ ۔ (ہم سب اپنے اپنے بچپن کا کوئی یاد گار واقعہ شیئر کریں اپنے اپنے بلاگ پر)

دوسرا دن : یوم ٹیگ / فی البدیہہ ٹیگ ۔۔۔ یعنی کوئی ایک آسان سا ٹیگ سلسلہ ہوں اور تمام بلاگرز ٹیگ جواب لکھیں اپنے اپنے بلاگ پر

تیسرا دن : یوم تعلیم ۔ ۔ ۔ یعنی اسکول ، کالج ، یونیورسٹی یا اردگرد سے تعلیمی حوالے سے کوئی سی بھی عام سی بات ، خیال یا منفرد یاد اپنے بلاگ پر شیئر کر سکتے ہیں اور اگر یوم تعلیم کو مکمل سنجیدہ شکل دینا چاہیں تو تعلیم کے حوالے سے کوئی موضوع رکھا جا سکتا ہے جس پر سب لکھیں ۔

چوتھا دن : یوم آج ۔ ۔ ۔ اس دن کیا کیا جائے ؟ کیا موضوع ہو ؟ یا پھر اردو بلاگ دنیا کو آپس میں مربوط کرنے کے لیے ڈسکشن ڈے رکھنا چاہیے اردو بلاگ دنیا کے مسائل کو فوکس کیا جائے۔ ۔ ۔ تمام بلاگ دنیا کا بہتر باہمی رابطہ ۔ ۔ ۔ کیا اردو بلاگ دنیا کو کسی ضابطہ اخلاق کی ضرورت ہے ؟

پانچواں دن : یوم باورچی خانہ ۔ ۔ ۔ سب بلاگرز کو کھانے پینے سے کچھ زیادہ ہی دلچسپی ہے تو سب بلاگرز کوئی سی بھی ایک ڈش خود بنائیں اور اس کی ترکیب اور تصویر شیئر کریں بلاگ پر۔ ۔ ۔ اور یہ بھی بتا سکتے ہیں کہ اس ڈش کو چکھنے اور کھانے والوں پر کیا کچھ بیت گئی

چھٹا دن : یوم مزاح ۔ ۔ ۔ بلاگرز کوئی مزاحیہ تحریر لکھیں بلاگ پر

ساتواں دن : یوم فوٹو گرافی

اختتام

۔۔۔۔۔۔۔۔۔۔۔۔۔۔۔

ہفتہ بلاگستان کے آغاز سے پہلے ایک یاد دہانی کی پوسٹ کرنا بھی بہتر رہے گا ۔ ہفتہ بلاگستان بنیادی طور پر نئے بلاگرز کی حوصلہ افزائی اور تمام اردو بلاگرز کا ایک وقت میں مل بیٹھنے اور اپنے خیالات شیئر کرنے کے لیے ۔

وہ بلاگرز جن کا بلاگ “بلاگسپاٹ” پر ہے توجہ پلیز :

اکثر بلاگسپاٹ پر موجود بلاگز پر تبصرہ کرنا جوئے شیر لانے کے مترادف ہوتا ہے کئی بلاگز ایسے ہیں جن پر تبصرہ کرنے جائیں تو پیچیدہ طریقہ کار کی وجہ سے بغیر تبصرہ واپس آنا پڑتا ہے ۔ اگر آپ بلاگسپاٹ پر بنے ہوئے بلاگز پر تبصرہ شامل کرنے کا کچھ آسان طریقہ ہو تو اسے اپنے اپنے بلاگز پر فراہم کر دیں ۔

شکریہ